АСТАНА, 1 қазан – Sputnik. Ақтау гарнизонында белгісіз заттың жарылуынан әскери қызметші көз жұмды, деп хабарлайды Қарулы күштері құрлық әскерлерінің баспасөз қызметі.
Ведомствоның мәліметінше, 30 қыркүйекте Ақтау гарнизонының "Оймаша" оқу полигонында жұмыс барысында белгісіз зат жарылған. Салдарынан әскери қызметші түрлі жарақат алды.
"Оқиға орнына шұғыл түрде жедел жәрдем бригадасы шақырылды. Медицина қызметкерлерінің шұғыл әрекетіне қарамастан, әскери қызметші ауруханаға барар жолда қайтыс болды", - делінген хабарламада.
Белгілі болғандай, оқиға орнына "Батыс" өңірлік қолбасшылығы әскерлерінің қолбасшысы генерал-майор Оспанов бастаған комиссия жіберілген.
"Оқиғаның себебі мен мән-жайы анықталып жатыр. Әскери-тергеу органдары сотқа дейінгі тексеруді бастады. Тергеу мүддесі үшін өзге ақпарат жария етуге жатпайды", - деп атап өтті әскери ведомство.
Қарулы күштердің құрлық әскерлерінің басшылығы қайтыс болған әскери қызметшінің туған-туыстары мен жақындарына көңіл айтты.