АСТАНА, 25 қыркүйек – Sputnik. Астанада ЕАЭО елдері үкімет басшыларының қатысуымен "Иннопром. Қазақстан" халықаралық көрмесі басталды, деп хабарлайды Sputnik Қазақстан тілшісі.
Иннопром көрмесі
© Photo
Астанада INNOPROM.QAZAQSTAN халықаралық өнеркәсіптік көрмесі басталды. Көрмеде 12 мың шаршы метрден астам аумақта Қазақстан, Ресей, Армения экспозициялары және тақырыптық бөлімдер бойынша 300-ден астам компанияның өнімдері ұсынылған. Олардың ішінде: медициналық жабдықтар мен бұйымдар, химия өнеркәсібі, металлургия, өнеркәсіптік IT, машина жасау, құрылыс индустриясы және жиһаз өнеркәсібі, энергетикалық машина жасау және жеңіл өнеркәсіп бар.
Қазақстан премьер-министрі Әлихан Смайылов пен Ресей үкіметінің төрағасы Михаил Мишустин "Экспо" аумағындағы халықаралық көрмені аралап шықты. Сондай-ақ іс-шараға Беларусь премьер-министрі Роман Головченко, Қырғыз Республикасының министрлер кабинетінің төрағасы Ақылбек Жапаров та келді.
Іс-шараға Беларусь және Қырғызстан үкімет басшылары да келді
© Sputnik / Александр Астафьев
/ Көрмені аралап көргеннен кейін премьерлердің қатысуымен "Жаңа заманның өнеркәсіптік стратегиялары" атты бас пленарлық сессия өтеді.
INNOPROM.QAZAQSTAN көрмесінің мақсаты – өңірде жаһандық тәжірибе алмасу, өнеркәсіптік кооперацияларды дамыту, жаңа өткізу нарықтарын ашу, серіктестер, тапсырыс берушілер мен жеткізушілерді іздеу үшін перспективалы алаң құру.
Іс-шара әлемнің түкпір-түкпірінен билік өкілдерін, өндірушілер мен бизнесті біріктіреді. Дөңгелек үстелдер мен пікірталас алаңдары барысында олар жаһандық нарықты дамытудың өзекті мәселелерін талқылайды.
Көрме аясында арнайы тақырыптық сессиялар жоспарланып отыр.