АСТАНА, 18 қыркүйек – Sputnik. Әділет министрлігі қазақстандықтарды соңғы кездері жиілеп кеткен алаяқтық әрекеттерден сақтануға шақырды.
Министрліктің ресми өкілі Талғат Уәлидің айтуынша, алаяқтар өздерін әділет органдарының қызметкері ретінде таныстырып, азаматтарды сендіру үшін мемлекеттік қызметшінің ID картасын көрсетіп жүр.
"Алаяқтар азаматтарға хабарласып, өздерін әділет министрлігінің басшысы немесе қызметкері ретінде таныстырып, жеке деректерін сұрап жүр. Осыған орай, әділет министрлігі бейтаныс азаматтарға немесе телефон шалған бөтен тұлғалар мен интернет-ресурстарға дербес деректері туралы (жеке куәлік, ЖСН нөмірі, банк карточкаларының мәліметі, мекенжайы) мәліметтерін таратпауды сұрайды", - деді Уәли.
Ол әділет министрлігінің қызметкерлері телефон арқылы азаматтардың жеке деректерін сұратпайтынын атап өтті.
Ведомстводағылар осындай фактілермен бетпе-бет келген қазақстандықтарды құқық қорғау органдарына хабарласуға шақырды.
Әділет министрлігінің қызметі туралы қандай да бір ақпаратты 119 нөмірі арқылы Call-орталықтан білуге болады.