АСТАНА, 5 қыркүйек – Sputnik. Мемлекеттік техникалық қызмет қазақстандықтарға Trojan Downloader зиянды бағдарламасын іске қосатын фишингтік интернет-ресурс анықталғанын ескертті.
Ол Venom RAT v6.0.1 зиянды бағдарламалық қамтамасыз ету құралын компьютерге орнатады.
Бағдарлама деректерді ұрлайды, веб-камераға қолжетімділік алады және қаскүнемге басқа біреудің компьютерін қашықтан басқаруға мүмкіндік береді.
Бағдарлама мемлекеттік қызметтерді алу кезінде NCALayer-ге арналған жаңарту ретінде компьютерге енеді.
Мемлекеттік техникалық қызмет мұндай бағдарламаларды жүктеп, орнатпауға және күдікті сілтемелерге өтпеуге кеңес береді.
"KZ CERT компьютерлік инциденттерге ден қою ұлттық қызметі домендік атаудың шетелдік тіркеушісіне қажет шаралар қабылдау туралы ақпарат жолдады. Сонымен бірге ішкі ақпарат алмасу платформасының көмегімен мемлекеттік органдар мен ақпараттық қауіпсіздіктің жедел орталықтарына хабарламалар жіберілді"- делінген хабарламада.