АЛМАТЫ, 24 тамыз – Sputnik. Брикс саммитінде сөз сөйлеген Қасым-Жомарт Тоқаев ШЫҰ, БРИКС және БРИКС Плюс құрамындағы елдер әлеуеттерін біріктіру керек деді. Бұл туралы Ақорда жазды.
Тоқаевтың айтуынша, БРИКС және "БРИКС Плюс" құрамындағы серіктестер ортақ игілік үшін осы бастаманы жүзеге асыру ісінде бірлесе әрекет ете алар еді. "ШЫҰ, БРИКС және БРИКС Плюс құрамындағы елдер өте маңызды саналатын цифрлық орта, электрондық коммерция, киберқауіпсіздік салаларындағы әлеуеттерін біріктіріп, ақпарат алмасуды кеңейткені жөн. Келесі жылы Қазақстанда Шанхай ынтымақтастық ұйымының Цифрлық форумы өтеді.
"БРИКС Плюс" аясындағы серіктестерімізді осы маңызды шараға қатысуға шақырамын", - деді президент.
Қасым-Жомарт Тоқаев барша серіктестерді "Солтүстік-Шығыс" пен "Шығыс-Батыс" көлік дәліздеріне қатысты экономикалық, сауда, көлік және инвестициялық жобаларды бірлесе жүзеге асыруға шақырды.
"Аса маңызды "Бір белдеу – бір жол" бастамасын толықтыратын Транскаспий халықаралық көлік дәлізі сауда саласындағы ынтымақтастыққа кең мүмкіндік ашады. Мұндай ықпалдастық өңіраралық сауда-саттықтың дамуына және біздің аймақтардың көлік-транзит әлеуетін толық танытуға септігін тигізеді", деді Тоқаев Брикс саммитінде сөлйгене сөзінде.