АСТАНА, 22 тамыз – Sputnik. Қазақстанның Ұлттық қауіпсіздік комитеті мемлекеттік шекарадағы жағдайға қатысты түсініктеме берді.
Ведомство ақпаратынша, ҰҚК-ның Шекара қызметі шекаралық аймақта, сонымен қатар шекаралық өткізу пунктерінде құқыққа қайшы іс-әрекетке қарсы іс-қимыл бойынша шаралар кешенін өткізіп жатыр.
"Қандай да бір шектеулер енгізілмеді. Өткізу бекеттері, оның ішінде қазақ-қырғыз шекара учаскесі штаттық режимде жұмыс істеп тұр. Тексеру уақытының регламенттік нормативтері қатаң сақталуда және автокөліктерді өткізу деңгейі қазіргі маусымға тән күнделікті көрсеткіштер аясында", - делінген хабарламада.
Бұған дейін қазақ-қырғыз шекарасындағы өткізу бекетінде жүздеген жүк көлігі кептелісте тұрғаны хабарланды.
Қырғызстандық БАҚ шекарадағы жағдайға Қырғызстанның Қазақстанға су беруді тоқтатуы себеп болуы мүмкін деп болжаған.