АЛМАТЫ, 15 тамыз – Sputnik. Шымкентте дүкенге баса көктеп кіріп, гүлді тегін әкеткен адамның қасында мемлекеттік қызметші де болған. Оған қатаң сөгіс берілді, деп хабарлайды Шымкент қалалық мемлекеттік кірістер департаменті.
Мемлекеттік кірістер департаменті Шымкент қалалық департаментінің айтуынша, қатаң сөгіс туралы шешімді өз беттерімен шығармаған.
"Мемлекеттік қызмет істері жөніндегі агенттігі Шымкент қалалық департаменті қатаң сөгіс беріңіздер деп бізге ұсыныс жіберді. Солардың ұсынысы негізінде дүкенде болған мемлекеттік қызметшіге қатаң сөгіс берілді. Ол этиканы бұзғаны үшін сондай шара қолданылды", - дейді Шымкент қалалық мемлекеттік кірістер департаментінің бөлім басшысы Талғат Бақытұлы.
Талғат Бақытұлының айтуынша, Әдеп жөніндегі Кодекс бойынша тәртіптік жаза қолданылды.
"Мемлекеттік қызметші Әдеп жөніндегі Кодексті сақтамағандықтан шара қолдандық. Әлеуметтік желіде дұрыс ақпарат тарап жатқан жоқ. Мемлекеттік қызметші Әдеп Кодексін сақтамағандықтан тәртіптік жазаға тартылады деген президент жарлығы бар. 153 жарлық 2015 жылы 29 желтоқсанда жазылған. Жарлықта жұмыстан шығарылады деп жазбаған, тәртіптік жазаға тартылады делінген", - дейді Талғат Бақытұлы.