АЛМАТЫ, 1 тамыз – Sputnik. Делдалдық қызметі үшін пара алған Алматы тұрғыны ұсталды, деп хабарлады сыбайлас жемқорлыққа қарсы қызмет.
Күдікті кәсіпкерді пара беруге итермелеген.
"Ол өзін құқық қорғау органының қызметкерімін деп таныстырып, кәсіпкерлік субъектісіне қатысты тексеру жүргізіліп жатқандығы туралы жалған ақпарат берген. Күдікті өзінің делдалдық қызметін ұсынып, мәселені шешу үшін 390 мың АҚШ долларын талап еткен", - дейді ведомство.
Кәсіпкер алаяқтық әрекеттерге бой алдырмай, Сыбайлас жемқорлыққа қарсы қызметке жүгінген. Нәтижесінде күдікті ақшаны алу кезінде ұсталды.
Антикордың айтуынша, күдіктінің тұрғылықты жерін тінту кезінде қосымша 470 мың АҚШ доллары табылды.
"Ол ақшаның қайдан алынғаны және ұсталған адамның басқа қылмыстарға қатысы бар-жоғы тексеріліп жатыр. Сот күдіктіге қатысты "қамауда ұстау" бұлтартпау шарасын тағайындады. Тергеу жүріп жатыр", - деді антикор.