АЛМАТЫ, 26 шілде – Sputnik. Алматының бірнеше ауданында ауыз су жоқ. Тұрғындар наразылық білдіріп жатыр. Алматы қаласы әкімдігінің мамандары мәселені тауға шығып түсіндірді, деп хабарлайды Sputnik Қазақстан тілшісі.
Күн райының шілдеде күрт ысуы алматылықтар үшін оңайға соқпады. Алматының Наурызбай, Бостандық және Медеу ауданында ауыз су жоқ.
"Таудағы мұздықтар күрт ерігендіктен өзендер қатты лайланып кетті. Бұл лайланған суды тұтынуға болмайды. Негізі ауыз су тазалығы талап бойынша 40 мг.дм/куб болу керек, қазіргі күні 130-дан асып кетіп тұр. Су тұнып үлгермей жатыр", - дейді Алматы энергетика және сумен жабдықтау басқармасының басшысы Талғат Малыбаев.
Алматының үш ауданында ауыз су жоқ
© Sputnik / Айдана Дайырова
Алматының үш ауданында ауыз су жоқ
© Sputnik / Айдана Дайырова
Алматының үш ауданында ауыз су жоқ
© Sputnik / Айдана Дайырова
Оның айтуынша, фильтрлік станцияға суды тазаламай жіберсе техногендік апат болады.
"Су лайы кетіп, тазарғанда ғана беріледі. Нақты мына күні су береміз деп айту мүмкін емес. Жақында күн салқындайды, су деңгейі төмендеп, өзен жағаларын шаймайды. Сәйкесінше су тазарады", - дейді Талғат Малыбаев.
Бұған дейін "Алматы су" зертханасында судан күніне екі рет сынама алынса, қазіргі күні сағат сайын алынып жатыр. Бірақ көңіл көншітерлік жаңалық жоқ. Ал суға сараптама жасап отырған зертханашылар судың тым лай екенін айтады.