АЛМАТЫ, 11 шілде - Sputnik. Батыс Қазақстанда бір тәулікте 40-қа жуық өрт тіркелді, деп хабарлайды облыстық төтенше жағдайлар депаратменті.
Батыс Қазақстанда құрғақ шөп өртеніп жатыр. Қазіргі уақытта 35 учаскеде өрт сөндірілген.
"Сырым, Тасқала және Казталов аудандарындағы қалған учаскелерде өрт сөндіріліп жатыр. Теректі ауданы Айтиево кентінде 50 га жердегі өрт сөндірілді. Елді мекенге еш қауіп төніп тұрған жоқ. Эвакуацияланған тұрғындар өз үйлеріне оралды", - деп хабарлады ведомство.
Теректі ауданының Новопавловка кентінде 25 га аумақ, Жаңа өмір кентінде 17 га жер, Казталов ауданының Болашақ ауылында 4800 га жер жанған.
"Бөрлі ауданы Ақбұлақ кентінде 40 га, Сырым ауданының Тоғанас кентінде 7000 га жер өртке оранды. Ал Ақжайық ауданы Первомай ауылдық округінде 6700 га жер өртенді. Барлық аумақта өртке құрғақ шөптің жануы себеп болып отыр", - деп атап өтті депаратмент.
Өртті сөндіруге облыс бойынша барлығы 1000-ға жуық жеке құрам және 200-ден астам техника жұмылдырылған.
Бүгінгі таңда облыста сынап бағанасы 35-39 градусқа дейін көтеріліп, қатты ыстық болады деп болжанып отыр.