АСТАНА, 4 шілде – Sputnik. Астана қаласы қылмыстық істер жөніндегі ауданаралық соты World business consulting қаржы пирамидасының басшыларына үкім шығарды, деп хабарлайды елордалық соттың сайты.
Сот анықтағандай, үш сотталушы 2018-2022 жылдар аралығында Астана аумағында World Business Consulting қаржы пирамидасының құрылымдық бөлімшесін құрып, оны басқарған және азаматтардан 757 млн теңгеден астам қаражат тартқан.
Іс бойынша Қазақстанның әртүрлі қалаларынан 83 тұрғын жәбірленуші деп танылды.
Сот үкімімен үшеуі де қаржы пирамидасын құрғаны және басқарғаны үшін кінәлі деп танылды (ҚК 217-бабы 3-тармағы 2-тармақшасы).
Екі басшы 6 жыл 8 айға, ал біреуі 5 жылға бас бостандығынан айырылды. Сондай-ақ барлығы да қаржы ұйымдарында басшылық лауазымдарды атқару құқығынан айырылды.
Жәбірленушілердің азаматтық талап-арызы да қанағаттандырылды.
Үкім заңды күшіне енген жоқ.