АЛМАТЫ, 15 маусым – Sputnik. Президент Қасым-Жомарт Тоқаев ҚХР төрағасы Си Цзиньпинді мерейтойымен құттықтап, жеделхат жолдады, деп хабарлады Ақорда.
ҚХР төрағасы 70 жасқа толды.
Тоқаев Қытайдың саяси, әлеуметтік-экономикалық, мәдени-гуманитарлық салаларын дамытуға және халықаралық аренадағы жоғары беделін ілгерілетуге Си Цзиньпиннің қосқан жеке үлесін жоғары бағалады.
Ол Қытай халқының игілігі үшін Си Цзиньпиннің бастамалары мен ауқымды реформаларының табысты жүзеге асырылуына тілектестік білдірді.
"Біздің бірлескен күш-жігеріміз екі ел арасындағы ынтымақтастықты одан әрі нығайтуға және Қазақстан мен Қытай арасындағы көпжақты серіктестікті сапалы жаңа деңгейге шығаруға толық ықпал ететініне сенімдімін", – деп жазылған жеделхатта.
Айта кетері, Қасым-Жомарт Тоқаев Қазақстанның екі ел арасындағы жан-жақты стратегиялық серіктестік пен ынтымақтастықты нығайтуға ниетті екенін тағы да растады.