АСТАНА, 14 сәуір – Sputnik. Премьер-министр Әлихан Смайловтың төрағалығымен экономиканы демонополизациялау жөніндегі комиссияның кезекті отырысы өтті.
Оған орталық мемлекеттік органдар, Бас прокуратура, сыбайлас жемқорлыққа қарсы іс-қимыл агенттігі, бәсекелестікті қорғау және дамыту агенттігі, қаржылық мониторинг агенттіг басшылары қатысты.
Қатысушыларға "Астана қаласының ақылы автотұрақ кеңістігін құру, пайдалану және басқару" жобасы туралы ақпарат берілді. Жобаны жүзеге асыру үшін елорда әкімдігі 2018 жылы "Астана автотұрақ кеңістігі" ЖШС компаниясымен мемлекеттік жеке әріптестік келісімшартына отырған.
Талқылау қорытындысы бойынша уәкілетті мемлекеттік органдарға аталған келісімшартты республика заңнамасының нормаларын сақтау, оның ішінде монополияға қарсы реттеу тұрғысынан талдау тапсырылды.
Сонымен қатар отырыста энергетика саласындағы жекелеген нысандарды мемлекет меншігіне қайтару және қатты пайдалы қазбаларды барлауға бірқатар лицензия берудің заңдылығы мәселелері қаралды.