АСТАНА, 28 наурыз – Sputnik. Мемлекеттік айыптаушы Айжан Аймағанова бизнесмен, экс-президенттің бұрынғы құдасы Қайрат Боранбаевты мүлкін тәркілеп, 8 жылға бас бостандығынан айыруды сұрады.
"Боранбаев мүлкі тәркіленіп, сегіз жылға бас бостандығынан айыру жазасына кесілсін", - деп мәлімдеді прокурор соттағы жарыссөз барысында.
Еске салсақ, 30 желтоқсанда Астананың Сарыарқа аудандық №2 соты сұйытылған мұнай газын сату кезінде ақша жымқыру ісі бойынша сот тыңдауы басталды.
Қайрат Боранбаев пен оның бизнес-серіктесі Роман Наханов, сондай-ақ Qazaq Gaz АҚ басқарма басшысының бұрынғы орынбасары Тайыр Жанұзақ сұйытылған мұнай газын сатып алу кезінде 14,5 млрд теңге жымқырды және қылмыстық жолмен алынған қаражатты заңдастырды деген күдікке ілінді.
Айыптаушылардың 38 миллиард теңге ақшасы, 15 жылжымайтын мүлкі, үш автокөлігі бұғатталды.
Қаржылық мониторинг агенттігі де газ экспорты кезіндегі жымқыру және қылмыстық жолмен табылған мүлікті заңдастыру істері аясында Боранбаев пен басқа тұлғаларға қатысты сотқа дейінгі тергеуді жалғастырып жатқанын хабарлаған болатын.
Еске салсақ, Қайрат Боранбаев – қазақстандық кәсіпкер, Нұрсұлтан Назарбаевтың бұрынғы құдасы. Оның қызы Әлима Дариға Назарбаеваның ұлы Айсұлтанға тұрмысқа шыққан болатын. Айсұлтан 2020 жылы тамыз айында қайтыс болды.