ТАЛДЫҚОРҒАН, 8 наурыз – Sputnik. Жетісу облысында күн күрт жылынып кеткеннен кейін қар жылдам еріп, өзендердегі судың деңгейі көтерілді. Соның салдарынан кейбір аудандағы аулаларға су кірді, жолды су басты, деп хабарлайды Sputnik Қазақстан.
Әсіресе, Кербұлақ ауданында ауылдарды су басу қаупі жоғары болып тұр. Биыл ол жерде қар көп түсті, ал қалыңдығы бір метрден асып кеткен. Ауа райы күрт жылынғаннан кейін еріген қар суы Малайсары ауылындағы жолды басты, елді мекен судың қоршауында қалды.
"Төтенше жағдайлар депаратментінің қызметкерлері су басқан жол арқылы 50 адамды өткізді. Олардың ішінде 14 бала бар. Түнде судың деңгейі түскеннен кейін жүк көліктері мен джиптер өтіп кетті. Әзірше, үйлерді су басу қаупі жоқ. Жол қызметтері тәулік бойы кезекшілік атқарып жүр", - делінген әкімдіктің ресми хабарламасында.
Айта кетері, бұған дейін Кербұлақ ауданындағы Қызылжар ауылында үйлердің ауласына су кірді. Бұдан бөлек, еріген қардың суы цемент шығаратын зауыттың кірпіш қоршауын шайып кетті. Алакөл мен Ескелді аудандарында да ауылдарды су бас қаупі бар.