АСТАНА, 3 наурыз – Sputnik. Петропавлда балтамен қаруланған сыныптасына тосқауыл болған жасөспірім Нұрислам Сандыбай марапатталды, деп хабарлады КТК телеарнасы.
Нұрислам және тағы басқа оқушы шабуыл жасаған сыныптасының қолын бұрап, басқаларға зақым келтіруге мүмкіндік бермеді.
"Ер бала кенет тоқтап, қызды арт жағынан ұра бастады. Басында мұның бәрі қалжың деп ойлап, біз жай қарап тұрдық. Бірақ қыз бала отыра қалып, жылай бастады. Мен бірдеңе болғанын бірден түсіндім де, оның арт жағынан келдім де, оны ұстап тұруға тырыстым. Осыдан кейін 10-сынып оқушысы Алдияр да келіп, ол оның қолындағы балтаны жұлып алды. Содан кейін мен алғашқы көмек көрсетсін деп дереу дәрігерлерге бардым", - деді Нұрислам Сандыбай сол күнгі оқиғаны еске алып.
Жасөспірім мен оның ата-анасына "Жас сарбаз" әскери-патриоттық қозғалысының алғыс хаттары табысталды. Бұл бірінші марапаттау емес. Себебі мектептің өзінде осы төтенше жағдайдан кейін шабуыл жасаған оқушыны ұстауға қатысқан екі бала да бірден марапатталды. Ол кезде оқушыларға алғыс хаттар мен тәттілер берілді.
Бұған дейін хабарлағандай, 13 ақпанда Петропавлдағы 4-мектепте психиатрдың есебінде тұрған тоғызыншы сынып оқушысы сыныпқа балта алып келіп, білім мекемесінің дәлізінде оқушыларға шабуыл жасаған. Үш бала зардап шекті, оның екеуі жансақтау бөліміне жатқызылды. Зардап шеккен балалар бірнеше күннен кейін ауруханадан шығарылды.