АСТАНА, 24 ақпан – Sputnik. QazaqGaz ұлттық компаниясы Қазақстанның шығысын газдандыру жобасын әзірледі, деп хабарлады QazaqGaz төрағасының орынбасары Арман Қасенов.
"Шығысты газдандыру үшін біз "Газпромға" Шығыс Қазақстан аумағы арқылы өтетін жаңа транзиттік бағытты ұсындық. Ол бірқатар облысты қамтиды, қазір пысықталып жатыр. Техникалық-экономикалық есептеулер жүргіздік", - деді Қасенов қоғамдық кеңес отырысында.
Оның айтуынша, жоба транзиттік міндеттердің орындалуын да, ішкі нарықты газдандыруды да қамтамасыз ететін Қазақстан мен Қытай арасындағы Азия газ құбырының қолданыстағы шығыс жобасына ұқсас.
Қасенов сөзінше, нәтижесінде тұрақты газ көзі алынады. Ал транзиттік мәселеде эксплуатациялық шығындардың бір бөлігі магистральдық газ құбырын жобалау бойынша тауарлық-көліктік жұмыстарға ауысады.
Бұл ретте Қазақстан Павлодар, Абай және Шығыс Қазақстан облыстарын газбен қамтамасыз ете алар еді. Бұл өнеркәсіптік аймақтар үшін көмірді экологиялық таза отынмен алмастырудың жалғыз жолы әзірге Ресей газы болып отыр.
"Осы аймақтарды жақын арада қазақстандық газ ресурстарымен газдандыру мүмкін емес. Сондықтан біз ресейлік газды импорттау үшін жаңадан жасалған жағдайға үміт артып отырмыз", - деді Қасенов.
"Газпром" бұл ұсынысты қарастырып жатыр.
Мәселе Ресейден Қытайға Қазақстан аумағы арқылы өтетін газ құбырын тарту болып отыр.