АЛМАТЫ, 18 ақпан - Sputnik. Шетелдік инвесторлар Қазақстанға бағыттайтын инвестицияларды арттырып жатыр, деп хабарлайды премьер-министрдің ресми сайтында.
Премьер-министр Әлихан Смайылов ірі шетелдік компаниялардың, дипломатиялық корпус пен орталық мемлекеттік органдардың және "Атамекен" ҰКП өкілдерінің қатысуымен Инвестициялық ахуалды жақсарту жөніндегі кеңестің кезекті отырысын өткізді.
Ол сын-қатерлерге қарамастан Қазақстан былтыр экономикасы өсіп, инвестициялық тартымдылығын сақтап қалғанын атап өтті. Өткен жылдың 9 айында республикаға тартылған тікелей шетелдік инвестициялардың жалпы көлемі 17,8%-ға өсіп, 22,1 миллиард долларды құрады.
"Жаңа экономикалық жағдайда Қазақстан шетелдік инвесторлардың жұмысы үшін қолайлы жағдай жасап келеді. Бизнес-жобаларға тұрақты негізде фискалдық және фискалдық емес жеңілдіктерді, сондай-ақ преференцияларды қамтитын жан-жақты қолдау көрсетіліп отыр", - деді үкімет басшысы.
Әлихан Смайыловтың айтуынша, Қазақстанның инвестициялық тартымдылығын жақсартудың тағы бір маңызды қыры – болжауға болатын және ашық салық саясаты.Осыған байланысты фискалдық реттеуді қайта қарау үшін жаңа салық кодексі әзірленіп жатыр. Ол салықтық бақылауды цифрландыруды, сараланған мөлшерлемелерге көшуді, технологиялық жаңғыртуды ынталандыруды, арнаулы салық режимдерін оңайлатуды көздейді.
Отырыс аясында қатысушылар бизнес үшін әкімшілік кедергілерді жою, салық салуды жетілдіру, жаңа технологияларды дамыту, жаһандық экономикалық трендтердің Қазақстан экономикасына әсері туралы мәселелерді талқылады.