ПЕТРОПАВЛ, 17 ақпан – Sputnik. Петропавлда су құбырындағы зақым жойылғаннан кейін оны жазға дейін қоспау туралы шешім қабылданды, деп хабарлайды Sputnik Қазақстан тілшісі.
"Қызылжар су" ЖШС қызметкерлері Универсальная көшесіндегі зақымдалған су құбырына ысырманы орнату жұмыстарын түні бойы жүргізіп, кейіннен басқа су құбырын қосты. Осыдан кейін кешеден бері сусыз қалған Береке, Привокзальный шағын аудандарына және Рабочий кентіне су беріле бастады.
"Қызылжар су" ЖШС атқарушы директоры Арман Сауытовтың айтуынша, 16 ақпанда сағат 14.00-де оңтүстік-шығыс су құбырында қысым төмендеп кеткен. Зерттеу барысында теміржол ауданында диаметрі 800 миллиметр болатын су құбыры зақымданғаны анықталды.
"Бұл осы су құбырындағы үшінші зақым, сондықтан біз шұғыл түрде шешім қабылдадық: су құбырының бұл бөлігін оқшаулаймыз, яғни өшіреміз. Кешке және түні бойы жасадық. Таңертеңгі сағат бесте су бердік. Бірте-бірте сағат 10-ға дейін су қаладағы барлық пәтерде болды. Шағым жоқ, қысым қалыпқа келді. Бұл учаскенің зақымдануын одан әрі жою жоспарлы режимде жалғасады", - деді Сауытов журналистерге.
Енді компания қызметкерлері зақымдануды іздеп тауып, содан кейін жөндейді. Су құбыры 2009 жылы қайта құрылған кезде "құбырдағы құбыр" қағидаты бойынша жасау туралы жобалық шешім қабылданған, сондықтан зақымдануды бірден табу мүмкін болмаған.
"Зақымдануды жойғаннан кейін де, біз бұл су құбырын қоспаймыз, өйткені ол өте тиімсіз. Жазға дейін қосылмауы мүмкін. Су әлі бар, қаланың барлық тұрғыны мен кәсіпорнына жеткілікті, сондықтан одан әрі зақымданудың алдын алу үшін біз оны дайындаймыз, бірақ оны әзірге қоспаймыз", - деп түсіндірді Сауытов.
Петропавлдағы су құбырларында бір қыста бес рет ірі апат болды.
Коммуналдық қызметтер бұған толық жауап бере алмайды. Айтуларынша, ауа райы әсер еткен болуы мүмкін. Биыл өте кеш қар жауып, топырақ қабаты да қатып қалған. Мүмкін "құбырдағы құбыр" жобалық шешімі де апатқа әсер етуі мүмкін. Мұнымен қоса темір жол жақын орналасқандықтан жерде діріл көп болады.
Айтпақшы, бұл су құбыры 1980-81 жылдары теміржолдың өтініші бойынша пойыздарға судың жетіспеуіне байланысты салынған.
"Содан кейін әртүрлі токтардан қорғаныс болмағандықтан, ол өте тез бұзылды. 2009 жылы ұзындығы шамамен 3 шақырым болатын бұл учаске қайта құрылды. Содан кейін олар пластикті қолдана бастаған", - деп атап өтті Арман Сауытов.
Су құбырындағы бес апаттың үшеуі осы учаскеде, екеуі Жұмабаев көшесінде болды.
"Қызылжар су" ЖШС атқарушы директоры Арман Сауытов Жұмабаев көшесіндегі су құбырын да, осы су құбырын да бір уақытта және қазір жоқ фирма қайта жаңартқанын атап өтті. Сондықтан шағым түсіретін ешкім жоқ. Қалпына келтіру бойынша барлық шығынды толығымен "Қызылжар су" төлейді.
Қазіргі уақытта Петропавлда сумен жабдықтау желілерінің 57 пайызы тозған. Арман Сауытовтың айтуынша, оны біртіндеп азайту үшін жылына шамамен 20-30 шақырым құбырды ауыстыру қажет.