АСТАНА, 7 ақпан — Sputnik. Осы уақытқа дейін Түркиядағы жер сілкінісі кезінде қайтыс болған немесе зардап шеккен азаматтардың тізімінде Қазақстан азаматы жоқ. Бұл туралы сыртқы істер министрлігінің ресми өкілі Айбек Смадияров мәлімдеді, деп хабарлайды Sputnik Қазақстан тілшісі.
Қазіргі кезде Түркияда консулдық есепте Қазақстанның 968 азаматы тұр. Анкарада – 498, Ыстанбұлда – 45, Анталияда – 189 адам. Оған қоса, 8 219 қазақстандық студент білім алып жүр.
"Осы уақытқа дейін қайтыс болған немесе зардап шеккендердің тізімінде Қазақстан Республикасының азаматы жоқ. Сонымен қатар көптеген қираған ғимараттың астынан зардап шеккендерді құтқару жұмыстары әлі жалғасуда", - деді Смадияров бүгінгі брифингте.
Оның айтуынша, Түркияның мәліметіне сәйкес сол елде Қазақстанның 75 мыңға жуық азаматы болуы мүмкін.
"Қазіргі жағдайға байланысты сыртқы істер министрлігінде 72-05-00 телефоны бойынша шұғыл желі ашылды. Біздің азаматтарымыз хабарласып, көмек сұрай алады. Жақын арада шетелдегі мекемелеріміздің шұғыл байланыс нөмірлері жарияланады", - деп атап өтті Смадияров.