АСТАНА, 1 ақпан – Sputnik. Елорда тұрғыны мұзды суға құлап кеткен итті құтқару кезінде өзі суға батып кете жаздады. Оқиға куәгері астаналық әйелге көмекке келді, деп хабарлайды қалалық төтенше жағдайлар департаменті.
Елордалық ТЖД пультіне 31 қаңтар күні таңғы сағат 9:22-де Кенесары көшесінің бойында Есіл өзеніне иттің батып жатқаны туралы хабарлама келіп түсті.
"Әйел итімен серуендеп жүрген кезде үй жануары өзенге қарай жүгіріп, мұзға құлап кеткен. Әйел иттің соңынан жүгіріп жеткенімен, бірақ құтқару әрекеті сәтсіз болып, әйел де суға бата бастады. Құтқарушылар жеткенше сол аймақтан өтіп бара жатқан ер адам әйелді құтқарып қалды", - деп жазылған хабарламада.
ТЖД бөлімшелері жеткенде ит әлі суда болған. Құтқарушылар үй жануарын судан шығарып, иесіне тапсырды.
Қазір әйел мен үй жануарының жағдайы қанағаттанарлық, олардың өміріне қауіп төніп тұрған жоқ.