АЛМАТЫ, 26 қаңтар – Sputnik. Мемлекет басшысы "Қазақстан Республикасы президентінің жанындағы ғылым және технологиялар жөніндегі ұлттық кеңесті құру туралы" жарлыққа қол қойды, деп хабарлайды Ақорда.
Кеңес ұлттық ғылыми жүйені басқару ісін жетілдіруге және ғылым және ғылыми-техникалық қызмет саласындағы мемлекеттік саясатты одан әрі дамытуға ықпал етеді.
Ғылым және технологиялар жөніндегі ұлттық кеңестің құрамы мен ережесі осы жарлықпен бекітілді.
Кеңес құрамына халықаралық деңгейде танылған, ғылыми-зерттеу белсенділігі жоғары, ғылымның басым бағыттарында еңбек ететін академиктер мен ғалымдар, Беркли космологиялық физика орталығының физика және астрофизика профессоры, Нобель сыйлығының лауреаты Джордж Фицджеральд Смут III (АҚШ), сондай-ақ әлемнің жетекші ғылыми орталықтарында ғылыми-зерттеу жұмыстарымен айналысатын бірқатар отандасымыз енді.
"Отандық және шетелдік жетекші ғалымдардың ұлттық кеңеске мүше болуы Қазақстан ғылымын дамытуда перспективті және стратегиялық маңызды шешімдер қабылдауға оң септігін тигізеді", - делінген ақпаратта.