АЛМАТЫ, 17 қаңтар – Sputnik. Атыраулық полицейлер пәтер ішінде заңсыз бал өнімдерін дайындаған ер адамды анықтады, деп хабарлады облыстық полиция департаментінің баспасөз қызметі.
Атыраудың орталық ықшам ауданының тұрғындары көрші пәтерден шығатын күлімсі иіске шағымданып, полиция шақырған. Арызды тексеруге келген учаскелік полиция пәтер ішін тексергенде қолдан жасалған балды анықтаған. Бал жасаушы "өнерпаз" Алматы облысының 1988 жылғы тұрғыны болып шықты. Ол заңсыз жасалған бал өнімдерін сауда орындарына сатып жүрген.
35 жастағы азамат жалдамалы пәтердің ваннасында бал өнімдерін дайындаған
© Photo : Атырау облыстық полиция департаментінің баспасөз қызметі
"35 жастағы азаматтың жалдамалы пәтер ішінде санитарлық талаптарды сақтамай, пәтердің едені мен жуынатын бөлмесінде бал өнімдерін дайындап, бұл кәсіппен тиісті кәсіпкерлік рұқсат құжаттарсыз айналысқаны анықталды", - деп мәлімдеді баспасөз қызметі.
Оқиғаға қатысты іс-құжаттар жинақталып, Атырау қаласының санитарлық-эпидемиялогиялық бақылау басқармасы мен мемлекеттік кірістер басқармасына жолданды.