АЛМАТЫ, 1 желтоқсан - Sputnik. Алматы облысы Талғар ауданындағы 5000 тұрғынды жылусыз қалдырған апат қалпына келтірілді, деп хабарлайды аудандық әкімдіктің баспасөз қызметі.
Әкімдіктің айтуынша, магистральдық газ құбыры қалпына келтірілді, қазіргі уақытта абоненттерді газбен жабдықтауға қосу жұмыстары жүріп жатыр.
"Панфилов ауылында газ қосылған. Гүлдала ауылында абоненттердің 80% - і қосылған, Тұздыбастауда қауіпсіздік нормаларын сақтай отырып, біртіндеп қосылып жатыр. Газ компаниялары түскі асқа дейін жеткізілімді қалпына келтіретініне кепілдік берді", - деді облыстық әкімдік баспасөз қызметінің басшысы Ғалымұрат Жукел.
Сонымен қатар бейсенбіге қараған түні өшкен сумен жабдықтау мен электр энергиясы туралы түсініктеме берді. 30 қарашада Панфилов ауылындағы трансформаторлық қосалқы станциядағы сорғы жанып кеткен болатын. Осыған байланысты су беру тоқтатылды.
"Талғар ауданының "Талғар су" МКК қызметкерлері сорғыны ауыстырды. Сондай-ақ ауа-райына байланысты шағын аудан электр энергиясынсыз қалды. "Жерұйық", Жүздібастау ауылы – 300 үй. Гүлдала ауылында - 1500 үй бар. Қалпына келтіру жұмыстары жүріп жатыр, электр энергиясы сағат 13:00 қарай беріледі", — деп қорытындылады Ғалымұрат Жукел.
Айта кетейік, 30 қарашада сағат 19:00 шамасында шіріген ағаштың құлауынан Алматы облысының Панфилов кентіндегі магистральдық газ құбыры зақымданған. Тұздыбастау, Гүлдала, Панфилов ауылдарында, сондай-ақ Түрксіб ауданының Нұршашқан шағын ауданында 5 мыңға жуық тұрғын үй газсыз қалды. Газ беру кезең-кезеңімен сағат 01:00-ден басталды.