АСТАНА, 25 қазан – Sputnik. Қазақстандық делегация Пусан қаласында "Орталық Азия - Корея Республикасы" 15-ші ынтымақтастық форумына қатысты.
Іс-шараға сонымен қатар Қырғызстан, Тәжікстан, Түрікменстан мен Өзбекстанның сыртқы саяси ведомстволарының басшылары қатысты.
Форум аясында ҚР Сыртқы істер министрі Мұхтар Тілеуберді Корея Республикасының Сыртқы істер министрі Пак Чжинмен келіссөздер өткізіп, екіжақты және көпжақты ынтымақтастықтың өзекті мәселелерін талқылады.
Министрлер кеңейтілген стратегиялық әріптестікті одан әрі нығайтудың, жоғары деңгейдегі сапарлармен алмасудың маңыздылығын атап өтті.
Келесі жылы Корея Республикасының президенті Юн Сок Ёл Қазақстанға келеді деп жоспарланып отыр.
Пак Чжин қазақстандық делегацияны Республика күнімен құттықтап, Қазақстан Оңтүстік Кореяның Орталық Азиядағы басты серіктесі екенін атап өтті.