Әртіс цирк өнерінің қызығы мен шыжығы жайлы: біздің өмірімізді сақтандыру өте қымбат

Ол өмір жолы, цирктегі міндеті, мамандықтың қиындығы мен қызығы туралы Sputnik Қазақстан тілшісіне айтып берді.

Әділет Тиканов 1991жылы Павлодар облысында дүниеге келген. Бала күнінен биге әуес болған.

"Бала күнімде биден жарыс болды. Жан-жақтан неше түрлі топтар келді. Сол кезде биін көріп, таңғалдық. Өзімнің би тобымдағы балалармен циркке барамыз деп шештік. Цирк әртісі болу үшін оқуға грантқа түстім",- дейді Әділет.

Оның нағашысы құқыққорғау саласында қызмет етеді. Ол кісі Әділетті өзінің жолын қуып, полицей болғанын қалаған. Алайда бала арманы басқа еді.

"Би тобын бірге құрған достарыммен бірге цирк әртісі болдық, бірге жұмыс істедік. Бір ауылда көрші тұрамыз. Достарымызбен бүкіл Еуропаны шарладық. Қаншама фестивальге қатыстық. Мамандығымыздың арқасында талай жақсылықты көрдік",-дейді әртіс.

Әділеттің жары да цирк әртісі. Қайда жүрсе де жұбайлар бірге барып, бірге өнер көрсетеді. Қазір кішкентай ұлдары әке-шешенің жолын қуып, гимнастикамен шұғылданады. Әділет өз мамандығының қауіпті екенін де айтады.

"Мамандығымыз қауіпті. Біз Еуропаға гастрольге барарда сақтандыру жасатамыз. Оның құны да қымбат. Өйткені тәуекелі тым жоғары мамандық болып есептеледі. Қанша қауіпті болса да, мамандығым өзіме ұнайды. Мен өз ісімнің фанатымын. Біздің жұмыс жер бетіндегі ең керемет жұмыс деп есептеймін. Қазақстанда төрт-ақ цирк бар. Бір Қазақстанға кемінде 20 цирк керек", - дейді әртіс.

Италияда 370 цирк бар екен. Ал Қазақстан үшін 4 цирк деген тым аз. Бұл сала мамандарын қынжылтатын дүние. Цирк саны шешілмей тұрған жалғыз мәселе емес.

"Цирк әртістерінің зейнет жасын дұрыс ойластырмаған. Біз қауіпті жұмыс істейміз, екіншіден акробатпыз. Біздің жаттықтырушылар кезінде 15 жыл еңбек еткен соң зейнетке шыққан. 63 жастағы акробат ер адамды немесе 61 жасында гимнастика қимылын жасап жүрген әйелді елестетіп көріңізші", - дейді ол.

Әділет тіл білмеген адам көп қиындыққа тап болатынын айтады.

"Францияға бардық. Не ағылшын, не француз тілін білмейміз. Стюардесса келіп бір нәрсе сұрап жатыр. Біз түк түсінбейміз. "Жоқ" деп басымызды шайқап қоямыз. Тіпті су да ішпей аш қалған кезіміз болған. Содан бері тіл үйрене бастадық", - дейді Әділет.

Цирк әртісінің салмағы әйел үшін 45-52 келі, ал ер адам үшін 50-65 арасында ғана болуы керек. Әртістер үнемі жаттығу жасайтынын айтады.

Әділеттің айтуынша, цирк әртісі болғысы келетін талантты жастар өте көп. Сол мамандық жолында білім алып жатқандар қаншама. Бірақ олардың барлығын 4 циркке жұмысқа алу әсте мүмкін емес. "Қанаты бар" әртіс Әділет Тикановқа және барлық цирк әртісіне табыс тілеп, қош айтыстық. Кез келген мамандық сүйіп істегенде ғана керемет!