АСТАНА, 13 қазан – Sputnik. Ресей президенті Владимир Путин АӨСШК қатысушыларын азық-түлік тасымалының қалыпты жұмысын жандандыру үшін жасанды және заңсыз тосқауылдарды бірігіп жоюға шақырды, деп хабарлайды Sputnik Қазақстан тілшісі.
"Біз азық-түлік қауіпсіздігінің шұғыл міндеттерін шешу үшін тасымалдың қалыпты жұмысын қалпына келтіруге кедергі келтіретін жасанды және заңсыз тосқауыларды жоюға шақырамыз", - деді Путин Астанада өтіп жатқан Азиядағы өзара іс-қимыл және сенім шаралары кеңесінің алтыншы саммитінде.
Ол Ресей мұқтаж елдерді аса маңызды өнімдермен қамтамасыз етуге барынша тырысып жатқанын атап өтті.
Айтуынша, Ресей Азия елдері сияқты әлемдік қаржы жүйесі жұмысының принциптерін қайта қарауды қолдайды.
"Бастапқы қадам ретінде өзара есеп айырысуларда ұлттық валюталарды белсендірек пайдалануды ұсынамыз", - деді Ресей басшысы.
Оның пікірінше, мұндай шаралар мемлекеттердің қаржылық тәуелсіздігін нығайтуға септігін тигізеді.