Ресей президенті Владимир Путин Ресей Қауіпсіздік кеңесінің тұрақты мүшелерімен жедел кеңес өткізді.
Ресей басшысы Украина төңірегіндегі жағдай, соның ішінде Қырым көпірінде жарылғыш зат тиелген жүк көлігінің жарылуынан кейінгі ахуал туралы айтты.
"Бүгін таңертең қорғаныс министрлігінің ұсынысы және Ресей Бас штабының жоспары бойынша Украинаның энергетика, әскери басқару және байланыс нысандарына қарсы жоғары дәлдікте алыс қашықтыққа ұшатын қарумен соққы жасалды", - деді Путин Қауіпсіздік кеңесінің мүшелерімен кездесуінде.
Ол Ресей аумағында жаңа лаңкестік әрекеттер болған жағдайда, Украинаға қатаң жауап қайтарылатынын атап өтті.
"Егер біздің аумақтарда лаңкестік әрекеттер жалғаса беретін болса, Ресей қатаң жауап қайтарады және ауқымы Ресей Федерациясына төнген қауіп-қатер деңгейіне сәйкес болады. Ешкімде күмән болмауы керек", - деді Путин.