АСТАНА, 23 қыркүйек – Sputnik. Қазақстан заңнамасында банктердің "Мир" карталарына қызмет көрсетуіне және клиенттердің мұндай карталарды пайдалануына шектеулер қарастырылмаған, деп хабарлады Ұлттық банк.
"Қазақстандық банктер өздерінің операциялық және қаржылық қызметін дербес жүзеге асырады, төлем жүйесі операторларымен іскерлік қарым-қатынас орнатады, сондай-ақ банк қызметтерін көрсетуге, оның ішінде "Мир" карталарын шығару және қызмет көрсетуге қабылдауға қатысты мәселелер бойынша шешімдер қабылдайды", - деп хабарлады Ұлттық банк.
Бұған дейін түріктің Isbank және Denizbank банктері "Mир" карталарына қызмет көрсетуді тоқтатқанын хабарлады. Бұл шешім АҚШ пен Ұлыбританияның Ресей Федерациясына қарсы санкция салуына байланысты қабылданды.
Кейінірек еліміздегі ірі банк "Қазақстан Халық Банкі" өз банкоматтарында "Мир" картасына қызмет көрсетуді тоқтатты, алайда сатып алулар мен қызметтерді төлеу кезінде карталарға стандартты режимде қызмет көрсететінін хабарлады.
Сонымен қатар "Известия" газеті вьетнамдық BIDV банкі 2018 жылдан бері жұмыс істеп келе жатқан "Mир" карталарына қызмет көрсетуді тоқтатқанын жазды.