АСТАНА, 20 қыркүйек – Sputnik. Қазақстанда 17,3 миллион тонна астық жиналды, деп хабарлады Ауыл шаруашылығы министрлігінің баспасөз қызметі.
Әкімдіктердің деректеріне сәйкес, 13,9 миллион гектар дәнді және дәнді-бұршақты дақылдар жиналған. Бұл жалпы өнімнің 86,3%-і. Қазіргі таңда орташа өнімділік гектарына 12,5 центнер.
"Майлы дақылдардың жалпы түсімі 363 мың тонна, 3,6 миллион тонна көкөніс және 2,1 миллион тонна картоп жиналды. Егінді жинау жұмысы жалғасып жатыр", - делінген ақпаратта.
Елде жалпы сақтау сыйымдылығы 12,8 миллион тонна болатын 189 лицензияланған астық қабылдау кәсіпорны жұмыс істейді. Оларды жаңа өнімді қабылдауға дайындау бойынша жоспарлы жұмыс жүргізіліп жатқаны хабарланды.
Сондай-ақ, ауыл шаруашылығы тауарын өндірушілердің өзінің 16,6 миллион тонна астыққа есептелген сақтау қоймалары бар.
Министрліктің хабарлауынша, болжамды түсімді ескергенде бұл орындар жиналған астықты сақтау үшін жеткілікті.