НҰР-СҰЛТАН, 7 қыркүйек – Sputnik. Голландияның Харлем қаласында 2024 жылдан бастап қоғамдық орындарда етті жарнамалауға тыйым салу туралы шешім қабылданды. Осылайша, жергілікті билік мал шаруашылығының климатқа әсерін төмендетпек. Бұл туралы The Guardian хабарлады.
Тыйым күшіне енгеннен кейін автобустарда, үй-жайларда және қоғамдық орындардағы экрандарда ет жарнамасын жасауға болмайды.
Мал шаруашылығы үшін ормандарды кесуге, жануарлар жейтін жем-шөпті өсіру үшін топырақ пен суды ластайтын тыңайтқыштарды қолдануға тура келетіні анықталған соң, осындай шешім қабылданған.
Бастама авторлары бір жағынан климаттық дағдарыс туралы айтып, екінші жағынан оған ықпал ететін өнімдерді сатып алуға шақыра алмайтындарын мәлімдеді.
"Егер адамдар ет жеуді жалғастыра берсе, біз қарсы емеспіз. Алайда адамдарға климаттық дағдарыс туралы айтып, оның бір себебі болып отырған өнімдерді сатып алуға шақыра алмаймыз", - деді саясаткер Зигги Клазес.