НҰР-СҰЛТАН, 10 тамыз – Sputnik. Шымкентте әуе техникасының оқу-жаттығулары басталды. Әскерилер қала тұрғындары мен қонақтарын алаңдамауға шақырды, деп хабарлайды Otyrar.kz порталы.
Осы күндері әскери техника ұшады. Жауынгерлік дайындық жоспарына сәйкес, оқу-жаттығулар аптасына бірнеше рет өтеді.
"5 тамыздан бастап барлық әуе базасында жоспарлы ұшулар өтіп жатыр. Авиаторлар оны танымал ұшқыш Талғат Бигелдиновқа арнап отыр. Ми-35М, Ми-8 мен Ми-171Ш тікұшақтары, сондай-ақ, Су-30СМ, Су-27, Су-25 мен L-39 ұшақтары ұшады", - дейді әскерилер.
Жергілікті халық әскери техниканы көрген бойда үрейленбеуі үшін әскерилер қала тұрғындары мен қонақтарын алаңдамауға шақырды. Әуе базасының өкілдері аспаннан ештеңе шашылмайтынын жеткізді.
Айта кетері, бұған дейін Қарағанды қаласының тұрғындары түнгі уақытта реактивті ұшақты көргенін айтқан.
Қарулы күштердің әуе қорғаныс күштері жойғыш ұшақтардың аспанға көтерілгенін растап, оны да апта сайынғы әскери дайындық жоспары бойынша өтіп тұратын оқу-жаттығу ұшулары екенін түсіндірді.