НҰР-СҰЛТАН, 27 шілде – Sputnik. Болашақта қазақстандықтарға коронавирусқа қарсы вакцина алу үшін отандық QazVac қана ұсынылуы мүмкін. Бұл туралы денсаулық сақтау вице-министрі – Бас мемлекеттік санитарлық дәрігер Айжан Есмағамбетова мәлімдеді, деп хабарлайды Sputnik Қазақстан тілшісі.
Вице-министр Pfizer тек жасөспірімдер, жүкті әйелдер және бала емізетін аналар үшін ғана сатып алынатынын атап өтті.
"Негізгі санат үшін қазіргі таңда Sinopharm және QazVac қолданылады. Ал болашақта тек QazVac вакцинасы қалуы мүмкін, өйткені біздің зауыттың қуаттылығы бүкіл қажеттілікті қамтуға мүмкіндік береді", - деді Есмағамбетова орталық коммуникациялар қызметінде өткен баспасөз мәслихатында.
Бас санитар дәрігер Қазақстанда вакцина көлемі жеткілікті екенін, сол себепті "Спутник V" вакцинасына қажеттілік жоқ екенін мәлімдеді.
Қазақстан балалар, жасөспірімдер мен жүкті әйелдерді вакциналау үшін 300 мың доза Pfizer сатып алуды жоспарлап отыр.