НҰР-СҰЛТАН, 23 шілде – Sputnik. Қазгидромет синоптиктері жексенбі, 24 шілде ауа райы қандай болатынын айтты.
Елдің батысында, солтүстік-батысында, солтүстігінде, шығысында, оңтүстік-шығыстың таулы аудандарында жаңбыр жауады, оңтүстік-батысында нөсер жауын, күн күркіреп, жел күшейеді. Батыста және шығыста – бұршақ, оңтүстікте – шаңды дауыл, солтүстікте түнде және таңертең тұман түседі деп күтілуде. Тек республиканың оңтүстігі мен орталығында күн ашық болады.
Дабылды ескерту
Атырау облысында найзағай ойнайды. Оңтүстік-батыстан 15-20 м/с жылдамдықпен жел соғады.
Батыс Қазақстанда күн күркіреп, бұршақ түседі, дауыл тұрады. Оңтүстік-шығыстан, шығыстан 15-20 м/с жел соғады.
Ақтөбе облысында да найзағай жарқырайды, жел күшейеді. Күндіз өңірдің оңтүстігінде 35 градус ыстық болады.
Қызылорда облысында шаңды дауыл болжануда. Солтүстік-шығыстан, шығыстан соғатын желдің екпіні 15-20 м/с дейін барады. Күндіз аптап ыстық, 44 градус күтілуде. Төтенше өрт қаупі сақталады.
Қостанай облысында да күндіз жоғары өрт қаупі сақталады.
Маңғыстау облысында қатты жаңбыр жауады. Солтүстігінде, батысы мен шығысында найғазай ойнап, бұршақ түсуі мүмкін, жел тұрады.
Солтүстік Қазақстан облысында түнде және таңертең тұман түседі. Желдің екпіні күндіз – 15-20 м/с.
Шығыс Қазақстан облысында – найзағай, бұршақ, дауыл. Күндіз желдің екпіні 25 м/с дейін барады.
Абай облысында күн күркіреп, бұршақ жауады, 25 м/с жел соғады. Облыстың оңтүстігінде 35 градус ыстық болады.
Павлодар облысында найзағай жарқырайды деп күтілуде, жел күшейеді.
24-28 шілде аралығында күндіз Алматы облысының басым бөлігінде аптап ыстық болады – 40-43 градус.
24-26 шілде күндері Жетісу облысында сынап бағанасы 41-43 градусқа дейін көтеріледі.
Мегаполистердегі ауа райы
Нұр-Сұлтанда түнде 12-14 градус, күндіз 27-29 градус ыстық.
Алматыда аптап ыстықтан дабылды ескерту жарияланды – 36-38 градус. Түнде плюс 22-24 градус.
Шымкентте де күн ыстық болады, 40-42 градус. Түнде – 27-29 градус.