НҰР-СҰЛТАН, 18 шілде – Sputnik. Петропавл қаласында ұры көзі көрмейтін қарияны тапа-тал түсте тонап кетті, деп хабарлайды Polisia.kz.
Полицияға 73 жастағы қала тұрғыны арызданды. Күндіз сағат 16:15 шамасында белгісіз біреу артынан келіп, сөмкесін жұлып алған. Ішінде ұялы телефон мен флеш-карта болған. Қарияның көзі көрмегендіктен, қылмыскерді сипаттап бере алмады. Полицейлер күдіктіні бейнебақылау камераларының көмегімен ұстап алды.
"Ол келесі күні азық-түлік дүкенінің кассасынан 250 мың теңге ұрлап кеткен. Осы әрекеті бейнебақылау камерасына жазылып қалған. 39 жастағы қала тұрғыны бұрын осы сияқты қылмыс жасағаны үшін сотты болған", - дейді полицейлер.
Қылмыстық кодексінің 191-бабы ("Тонау") және 188-бабы 3-бөлігі ("Ұрлық") бойынша сотқа тергеу шаралары қолға алынды. Күдікті қамауға алынды. Дүкеннен ұрланған ақшаның бір бөлігі тәркіленді.
Ал тоналған зейнеткердің сөмкесі мен ұялы телефоны қайтарылды.