НҰР-СҰЛТАН, 16 шілде - Sputnik. Қарағандыда көпқабатты үйдің ауласынан жаңа туған сәби табылды. Нәресте перинаталдық орталыққа ауыр халде жатқызылды.
15 шілде күні кешкі сағат тоғыз шамасында Қарағанды қаласының орталық полиция бөліміне медициналық мекемелердің біріне көпқабатты үйдің ауласынан табылған нәрестенің жеткізілгені туралы хабарлама келіп түсті. Оқиға орнына жедел тергеу тобы келді.
"21 жастағы куәгер кешке үйдің кіреберісінен шығып, орындықтың жанында көрпеге оралған сәби салынған қағаз картон қорапты көргенін айтты. Қыз оны қолына алып, жақын маңдағы медициналық мекемеге апарды", - деп хабарлады полиция департаментінің баспасөз қызметі.
Куәгердің екі сағат бұрын үй жағдайында дүниеге келген ер баланы тауып алғаны белгілі болды.
Баланың анасы анықталды. Ол 23 жастағы Қарағанды облысының тұрғыны болып шықты, деп жазады EKaraganda.kz сайты.
Полиция тергеу амалдарының жүріп жатқанын хабарлады.