НҰР-СҰЛТАН, 29 маусым – Sputnik. Солтүстік Қазақстан облысының әкімі Құмар Ақсақалов қазақ музыкалық театрының жаңа ғимараты қай кезде тапсырылатынын айтты, деп хабарлайды Sputnik Қазақстан тілшісі.
Жаңа театрдың құрылысы төрт жыл бұрын басталған. Әкімнің айтуынша, мердігер компания оны уақытында тапсыра алмады. Жоспар бойынша Сәбит Мұқанов атындағы қазақ театры 2019 жылдың аяғында ашылады делінген.
"Бюджеттен қажетті ақша берілген, қаржы жағынан ешқандай проблема болған жоқ. Соған қарамастан мердігер өз міндеттерін орындай алмады. Біз оларға бірнеше рет мүмкіндік бердік, тиісті хаттар да бар. Бірақ келісімшартты бұзуға тура келді", - деді Ақсақалов орталық коммуникациялар қызметінде өткен брифингте.
Қазіргі кезде жаңа мердігермен келісімшарт рәсімделді.
"Жылдың аяғына дейін осы маңызды әрі қажетті жобаны аяқтай аламыз деп сенемін. Сөйтіп, Сәбит Мұқанов атындағы қазақ музыкалық театрды ашамыз", - деп атап көрсетті Ақсақалов.