НҰР-СҰЛТАН, 24 маусым – Sputnik. Батыс Қазақстан облысында Шалқар көлінде жоғалған баланы іздестіру жұмыстары жалғасып жатыр, деп хабарлайды Sputnik Қазақстан.
Облыстық төтенше жағдайлар департаментінің мәліметіне сәйкес, бүгін таңғы сағат 8:05-де Шалғар көліне тағы тікұшақ жіберілді. Катермен іздестіру жұмыстары жалғасып жатыр. Сүңгуірлер де келді.
Айта кетері, 22 маусымда сағат 16:45-те Теректі ауданындағы Сарыөмір ауылынан бала жоғалғаны туралы хабар түскен. 9 жасар ұл баланы Шалқар көлінде үрлемелі матраспен жүзіп жүргенде жел әкетіп қалған. Жағада туыстары болған. 66 жастағы атасы немересінің алыс кеткенін көріп, суға секірген. Бірақ екеуі де оралмаған. Түнгі сағат 23:00-де құтқарушылар ер адамды көлдің арғы бетінен тапты. Ол баланың артынан жүзіп, көз жазып қалғанын айтты.