НҰР-СҰЛТАН, 20 маусым – Sputnik. Абай облысының Көкпекті ауданында Васильев өткелінде жол талғамайтын көлік аударылды, деп хабарлады Semeynews.kz.
ШҚО ПД баспасөз қызметінің хабарлауынша, 19 маусымда сағат 15:37 шамасында "Mitsubishi Pajero" көлігінің 45 жастағы жүргізушісі "Васильев өткелі – Көкпекті" бағытымен келе жатып, қауіпсіз жылдамдықты сақтамай, жол апатына ұшыраған. Жол жиегінде аударылған көліктің ішінде үш жолаушы болған.
Жол апаты салдарынан 41 жастағы жолаушы оқиға орнында көз жұмды. 45 жастағы жүргізуші және кәмелетке толмаған екі жолаушы (2008 және 2010 жылдары туған) түрлі дене жарақатымен ауруханаға жеткізілді.
"Аталған факті бойынша Қылмыстық кодекстің 345-бабының 3-бөлігі бойынша сотқа дейінгі тергеу басталды. Бірқатар сот сараптамасы тағайындалды", – делінген ведомство хабарламасында.