НҰР-СҰЛТАН, 17 маусым – Sputnik. Маусым айында дүкен сөрелерінде алғашқы маусымдық жемістер сатылымға шығады. Сатып алушыларды жеміс денсаулыққа пайдалы ма, құрамында химикаттар бар ма деген сұрақ мазалайды. Осы сұрақтарға ресейлік агроном Елизавета Тихонова Sputnik радиосына берген сұхбатында жауап берді.
Агрономның айтуынша, ағаштарға шашырататын заттардың ешқандай зияны жоқ. Ол өрік ағашы гүлдегеннен кейін бірден арнайы затпен өңделетінін айтты.
"Егер өңдемесе, оларды зиянкестер жей бастайды. Өрік тауарлық түрін жоғалтып, жеуге жарамсыз болады. Зиянкестер ұрыққа еніп, олар жеміс мәйегі мен сүйегіне жұмыртқалауы мүмкін", – дейді Тихонова.
Маманның айтуынша, өріктен улану ықтималдығы өте төмен. Өйткені ағашты бүрку кезінде қолданылатын заттар екі-үш апта ішінде ыдырап кетеді.
"Өрікті химикатпен өңдеу тұтынушыларға қауіпті емес. Өрікті өңдеген барлық зат екі-үш апта ішінде ыдырайды. Сондықтан пісіп-жетілу кезеңінде "химия" болмайды", – деп түйіндеді Елизавета Тихонова.
Ағзаға химиялық заттардың енуін толығымен болдырмау үшін өрікті жуып жеу керек.