НҰР-СҰЛТАН, 8 маусым – Sputnik. Қазақстан президенті Қасым-Жомарт Тоқаев өңірлер әкімдерін тағайындаудың жаңа ережелерін бекітті.
"Облыс аумағында орналасқан мәслихаттар немесе республикалық маңызы бар қалалар және астана мәслихаттары депутаттарының облыс, республикалық маңызы бар қала және астана әкімін лауазымға тағайындауға келісім беруі қағидалары жарлық ресми жарияланған күннен бастап қолданысқа енгізіледі", – делінген құжатта.
Жаңа ережелерге сәйкес, мемлекет басшысы мәслихаттарға ұсыныс негізінде облыс, республикалық маңызы бар қала және астана әкімі лауазымына кемінде екі кандидат ұсынады.
Дауыс беруге қатысқан депутаттардың ішінде ең көп дауыс жинаған кандидат келісім алған болып есептеледі.
Егер кандидаттар бірдей дауыс санын жинаған болса, есеп комиссиясы аталған кандидаттар арасында қайта дауыс беруді өткізу туралы шешім қабылдайды.