НҰР-СҰЛТАН, 6 маусым — Sputnik. Атаулы әлеуметтік көмек алушылар газды төмендетілген бағамен сатып ала алады.
"Биыл 1 шілдеден бастап "мемлекеттік атаулы әлеуметтік көмек және (немесе) тұрғын үй көмегін алатындар" санатына енетіндер елдің барлық газдандырылған өңірінде төмендетілген бағамен газ алу мүмкіндігіне ие болады", - деп хабарлады Ұлттық экономика министрлігінің баспасөз қызметі.
Бұл үшін тұтынушы Egov.kz.порталында атаулы әлеуметтік көмек және тұрғын үй көмегін алушы ретіндегі өзінің мәртебесін тексеруі қажет.
Мұндай санат құруға Ұлттық экономика министрлігінің табиғи монополияларды реттеу комитеті бастамашы болды. Ол үшін қоғамдық маңызы бар нарықтарда баға белгілеу қағидаларына өзгерістер мен толықтырулар енгізілді.
"Нәтижесінде 2022 жылдың 1 сәуірінен бастап Тараз және Орал қалаларында пилоттық жоба аясында жоғарыда аталған топтың азаматтары тауарлық газды 20%-ке төмендетілген бағамен алады. Бұл - 3 мыңнан астам тұтынушы. Бұл топтың тұтынушылары сәуір айындағы түбіртектерде газдың жаңа төмендетілген бағасын көрді", - деп толықтырды
Қазақстанда жан басына шаққандағы орташа табысы кедейлік шегінен аспайтын адамдар атаулы әлеуметтік көмек алады. Олардың ішіне республика азаматтары, оралмандар, босқындар, шетелдіктер, елде тұрақты тұратын азаматтығы жоқ адамдар енеді.
Тұрғын үй көмегі осы жерде тұрақты тұратын тұрмысы төмен отбасыларға (азаматтарға) беріледі.