ТАЛДЫҚОРҒАН, 4 маусым – Sputnik. Алматы – Қорғас тасжолында жантүршігерлік жол апаты болды.
Оқиға орнында түсірілген видео әлеуметтік желіде тарап жатыр. Кадрдан Mercedes-Benz 814 аз тонналы жүк көлігі бір бүйіріне аударылып, төбесі жұлынып кеткені көрінеді.
Жол апаты бір күн бұрын Алматы – Қорғас тасжолының 38 шақырымында болған.
Облыстық полицияның мәліметінше, жол апатынан 43 жастағы әйел көз жұмды – жүк көлігінің жолаушысы мен жүргізуші ауруханаға жатқызылды.
"Алдын ала мәлімет бойынша көлікте техникалық ақау пайда болған, соған байланысты жүргізуші рөлге ие бола алмай, көлікті аударып алған. Қазір қажетті сараптамалар тағайындалып, қылмыстық іс қозғалды", - деп хабарлады Алматы облысы полиция департаментінің баспасөз қызметі.