НҰР-СҰЛТАН, 17 сәуір – Sputnik. Жамбыл облысында әйел ажырасқаннан кейін жасауын сот арқылы қайтарып алды.
Әйел Тұрар Рысқұлов аудандық сотына қыз жасауын қайтарып алу талабымен жүгінген.
Аудандық соттың ақпаратынша, 2021 жылы маусымда талап қоюшы жауапкермен мұсылмандық некеге тұрған. Үйлену тойынан кейін қалыңдықтың туыстары дәстүр бойынша жасау сыйлаған. Алайда отбасындағы түсініспеушіліктерге байланысты ерлі-зайыпты ажырасып кетті.
"Күйеуінің туыстары жасауды қайтарудан бас тартқан соң, әйел сотқа арызданды. Істі қарау барысында сот медиациясын жүргізу жолымен тараптар дауды бітімгерлікпен шешу туралы келісім жасады. Оның шартына сәйкес, жауапкерлер әйелге қыз жасауын өз еркімен қайтаруға міндеттелді", -делінген Тұрар Рысқұлов сотының ақпаратында.
Ал әйел белгіленген мерзімде өз мүлкін әкетуге тиіс.
Сот ұйғарымы заңды күшіне енді.