Өңірлер

Павлодардағы электролиз зауытында өрт шықты

Газ құбыры жүйесі температураның көтерілуі салдарынан түтіндеп, соңы өртке ұласқан
Sputnik
НҰР-СҰЛТАН, 21 наурыз – Sputnik. Павлодардағы Қазақстан электролиз зауытында өрт шықты, деп хабарлады компанияның баспасөз қызметі.
Зауыттың газ құбыры жүйесі температураның көтерілуі салдарынан түтіндеп, соңы өртке ұласқан.
"20 наурызда Қазақстан электролиз зауытының электродтар шығаратын цехының газ тазалау жүйесінде өрт шықты. Газ құбыры жүйесінде температура көтеріліп, оның соңы өртке ұласқан", - деп хабарлады "Қазақстан электролиз зауыты" АҚ.
Компания хабарлауынша, барлық қызметкерлер жедел түрде эвакуацияланды.
Қауіпсіздік қызметі жедел жәрдем шақырып, жұмысшылардың денсаулығын тексерді.
"Жеке құрам арасында өрт салдарынан улану фактілері анықталған жоқ", - делінген хабарламада.