НҰР-СҰЛТАН, 10 наурыз – Sputnik. Шымкентте 9 наурыз түстен кейін және түнде жауған жаңбыр мөлшері айлық нормадан асып 28 миллиметрге жетті. Айлық көрсеткіш - 26 миллиметр, деп хабарлады Шымкент қаласы әкімдігінің баспасөз қызметі.
"Су басу қаупі бар аумақтардағы жаңбыр суын сору жұмыстарын үйлестіру үшін әкімдік, төтенше жағдайлар департаменті мен коммуналдық қызметтердің мамандары енген жедел штаб құрылды. Сондай-ақ, әр ауданнан арнайы кезекші бригадалар ұйымдастырылды", - деп жазды әлеуметтк желідегі парақшасында қала әкімінің баспасөз хатшысы Бекен Қоныс.
Мөлшерден тыс жауған жауын салдарынан қаладағы бірқатар көшені су басты. Қала әкімі Мұрат Әйтенов түнде жұмысшы топпен қаланы аралап тиісті тапсырма бергені хабарланды.
"Жеті мың текше метрге жуық жауын суы сорылды. Бұл жұмыстарға 68 техника мен 35 мотопомпа, 200-ден астам төтенше жағдай қызметкерлері мен әкімдік қызметкерлері жұмылдырылды", - деді баспасөз хатшы.
Қазгидромет мамандарының мәліметі бойынша, алдағы бір апта тағы да жауын-шашын жалғасады. Су басуға қарсы арнайы топ құрылған.