Әлем

Оппозиционер Юн Сок Ель Оңтүстік Корея президенті болды

Ұлттық сайлау комиссиясының мәліметі бойынша Юн Сок Ель 48,56% дауыс жинады
Sputnik
АЛМАТЫ, 10 наурыз – Sputnik. Консервативті оппозициялық "Азаматтық күш" партиясының кандидаты Юн Сок Ель сайлау нәтижесінде Оңтүстік Кореяның президенті болды, деп хабарлады РИА Новости елдің ұлттық сайлау комиссиясына сілтеме жасап.
Оңтүстік Корея президенті Юн Сок Ель
Оңтүстік Кореяда президент сайлауы 9 наурызда өтті, оған сайлауда дауыс беруге құқығы бар азаматтардың 77,1%-і барған. 44 миллионнан астам сайлаушыдан 34 миллионнан астам адам дауыс берді. Президентке негізгі үміткерлер қатарында билеуші Біріккен демократиялық партияның кандидаты Ли Чжэ Мен және оппозициялық "Азаматтық күш" консервативті партиясының кандидаты Юн Сок Ель болды.
Ұлттық сайлау комиссиясының мәліметі бойынша, Юн Сок Ель 48,56%, ал Ли Чжэ Мен 47,83% дауыс жинады.

"Сайлау науқаны кезінде көп нәрсе үйрендім. Біз азаматтар дауыс беруі үшін сайлау өткіземіз. Жарыс аяқталды, енді азаматтарымыз үшін, Корея Республикасы үшін бәріміз күш біріктіруіміз керек", - деді Юн Сок Ель жеңіске жеткеннен кейін халыққа үндеуінде.

Бұрынғы Бас прокурор Юн Сок Ель саясатпен айналыса бастағанына көп уақыт болған жоқ. Ол 2020 жылдың аяғынан бастап прокуратура реформасына қарсы шыққан соң БАҚ беттерінде жиі аталып, танымал бола бастады.