НҰР-СҰЛТАН, 9 наурыз – Sputnik. Цифрлық даму, инновациялар және аэроғарыш өнеркәсібі вице-министрі Асхат Оразбек Ресей жаһандық интернеттен ажыратылған жағдайда Қазақстанда байланыс нашарламайтынын айтты, деп хабарлайды Sputnik Қазақстан тілшісі.
"Қазақстанның тек Ресей арқылы емес, әртүрлі торабы бар. Яғни Қазақстанға интернеттен толығымен ажырау қаупі ешқашан төнбейді. Бұл үшін уайымдамаңыздар", - деді Оразбек мәжіліс кулуарында.
Вице-министр "Қазақстанда интернет нашарлай ма?" деген сауалға да "жоқ" деп жауап берді.
"Менің ойымша, нашарламайды. Өйткені Қытаймен арадағы тораптар бізге, мысалы, Еуропадан алатын трафикті сол көлемде алуға мүмкіндік береді", - деді ол.
Айтуынша, цифрлық даму министрлігі барлық ықтимал тәуекелді зерделеп, Қазақстанда интернетке қатысты айтарлықтай проблема болмайды деген болжамға келген.