АЛМАТЫ, 17 ақпан – Sputnik. Мемлекет басшысы Қасым-Жомарт Тоқаев ішкі істер министріне елдегі қаңтардағы қайғылы жағдайлардың себептеріне объективті тергеу жүргізіп, ұсталған адамдардың конституциялық құқығын қорғау бойынша жұмысты жалғастыруды тапсырды.
Ақорданың хабарлауынша, ішкі істер министрі Ерлан Тұрғымбаев президентке еліміздегі құқықтық тәртіпті қалпына келтіру жұмыстары туралы мәлімет берді. Министр ақпаратына сәйкес, қазір ішкі істер министрлігінде 2 739 қылмыстық іс бойынша тергеп-тексеру жүріп жатыр.
Ұрлық, заңсыз қару сату, өзгенің мүлкін қасақана бүлдіру және басқа да деректер бойынша іс қозғалған. Қазірг 271 адам қамауда отыр. Олардың 196-сы бұрын қылмыстық жауапкершілікке тартылған азаматтар.
Ерлан Тұрғымбаевтың айтуынша, тергеу барысында азаматтардың құқықтары сақталады. Қылмыс құрамына байланысты, қоғамнан оқшаулауға жатпайтын 103 азамат тергеу изоляторларынан босатылды. Тағы 200-ден астам күдіктіге қатысты ешқайда кетпеу туралы қолхат алу немесе кепілдік қою бойынша шаралар қабылданып, тергеу изоляторларына қамамауға шешім шығарылған.
Министр парламент мәжілісінің депутаттарына, қоғамдық-бақылау комиссиялары мен үкіметтік емес ұйымдардың өкілдеріне тергеу изоляторларына кіруге мүмкіндік берілгенін жеткізді.
Қасым-Жомарт Тоқаевқа ішкі істер органдарының дағдарыс жағдайларына дайындығын арттыруға, күштік органдардың өзара іс-қимыл алгоритмін қайта қарауға бағытталған шаралар туралы мәлімет берілді.
Президент ішкі істер министрлігіне елдегі құқықтық тәртіпті қамтамасыз ету, ұсталған адамдардың конституциялық құқықтарын қорғау және қаңтардағы қайғылы жағдайлардың себептеріне объективті тергеу жүргізу жөніндегі жұмыстарды жалғастыруды тапсырды.