АЛМАТЫ, 17 ақпан – Sputnik. Мемлекет басшысы Қасым-Жомарт Тоқаев қорғаныс министрі Руслан Жақсылықовты қабылдады, деп хабарлады Ақорда.
Министр президентке Қазақстан армиясын реформалау үшін жүргізіліп жатқан жұмыстар туралы есеп берді.
Жақсылықов "Қауіпсіз ел" ұлттық жобасының жүзеге асырылу барысы туралы, Қарулы күштер құрылымы мен құрамын жаңғырту және әскери дайындықты жетілдіру, цифрландыру ісін одан әрі жалғастыру, әскери инфрақұрылымды дамыту, әскери қызметтің беделі мен тартымдылығын арттыру мәселесі жөнінде баяндады.
"Қасым-Жомарт Тоқаевқа мемлекеттің әскери қауіпсіздігін қамтамасыз ету жөніндегі, оның ішінде арнайы операциялар күштерін қалыптастыру аясындағы міндеттерді шешудің тиімділігін арттыруға бағытталған іс-шаралар жөнінде ақпарат берілді", - делінген хабарламада.
Бұдан бөлек Жоғарғы бас қолбасшыға жеке құрамның жабдықталуына қатысты қазіргі ахуал, қару-жарақ пен әскери техниканың жағдайы, материалдық-техникалық құралдардың қолда бар қоры жөнінде баяндалды. Мемлекет басшысының тапсырмасын іске асыру аясында әскери ведомство отандық қорғаныс-өнеркәсіп кешенімен өзара ықпалдаса отырып, әскерді техникалық тұрғыдан қайта жарақтау шараларын қабылдап жатыр.
Кездесу соңында президент Қарулы күштердің кешенді әрі жүйелі дамуын қамтамасыз етуге және олардың қажетті деңгейдегі әскери дайындығына қолдау көрсетуге, сондай-ақ еліміздің қорғаныс қабілетін одан әрі арттыруға бағытталған бірқатар тапсырма берді.